Yangiliklar

Green Universityda 1-oktyabr — O‘qituvchi va murabbiylar kuni munosabati bilan tadbir tashkil etildi.

Tadbir davomida ta’lim va ilm-fan sohasida samarali faoliyat olib borayotgan, yosh avlodni tarbiyalash, ularga zamonaviy bilim va ko‘nikmalar berish, shuningdek, ekologiya va atrof-muhitni muhofaza qilish yo‘nalishida munosib hissa qo‘shib kelayotgan bir guruh professor-o‘qituvchilar hamda xodimlarning mehnati e’tirof etildi.

Quvonarlisi, tadbir doirasida tizim tashkilotlarida faoliyat yuritayotgan bir qator professor-o‘qituvchi va xodimlar “O‘zbekiston Respublikasi mustaqilligining 35 yilligi” esdalik nishoni bilan taqdirlandilar.

Mazkur yuksak e’tirof ularning mamlakatimiz taraqqiyoti, ta’lim va ilm-fan rivoji hamda yosh avlod kamolotiga qo‘shayotgan munosib hissasining ramziy ifodasidir.

Taqdirlangan barcha ustoz va xodimlarni ushbu munosib e’tirof bilan samimiy muborakbod etamiz!

Ustoz mehnati — kelajak poydevori!